Friday, January 25, 2013

ගනදුරු මැදියම දුටු ව්‍යාජ අරුනැල්ල



ගුනදාස අමරසේකරගේ "ගමනක අග" නවකථාවේ අවසන් භාගයේදී එහි කථානායකවරයා වන පියදාස නැවත ලංකාවට පැමිනේ.පියදාස පා තබන්නේ එල්ටීටීඊ සංවිධානය අතුගා දමන ලද "නිදහස් කරගනු ලැබූ" ලංකාවටයි.ඔහු ලංකාවට එන්නේ දීර්ඝ කාලයක් විදේශගතව ජීවත්වීමෙන් අනතුරුවය.

ඔහු දකින ලංකාව විදෙස්ගත වීමට පෙර ඔහු දත් රටට වඩා මුලුමනින්ම වෙනස් එකකි. විශාල ඉදිකිරීම් , වීදි පුරා පිරී ඉතිරී යන වාහන ඔහු දකී. අධික තදබදයක් ඇතිකරමින් නාගරිකව ධාවනය වන වාහන කන්දරාව ඔහු තුල මහත් විස්මයක් දල්වයි. වෙලද භාන්ඩ ආනයන කිරීම මගින් සත් මහල් ප්‍රාසාදයක් ඉදිකරගෙන සිටින ව්‍යාපාරිකයෙක්ගේ නිවෙස හෙතෙම පසුකරයි.මේ සියල්ල මධ්‍යයේ ලංකාවේ අලුත පලවන පතපොත ගැන හෙතෙම මිතුරෙක්ගෙන් විමසයි.ගාමන්ට් කෙල්ලන් වෙනුවෙන් පලවන බාල නවකථා හැර කිසිවක් දැන් වැඩිපුර මුද්‍රනය වන්නේ නැති බව මිතුරා ඔහුට පිලිතුරු දෙයි.යුද්ධය ජයගැනීම නිසා ඇතිවූ ආස්වාදයත් සංවර්ධනය නමින් ධනවාදී නර රකුස් සමාජයක් ලංකාවේ බිහිවෙමින් තිබීම නිසා ඇති වූ ඉච්ඡාභංගත්වයත් යන පරස්පර හැගීම් පියදාස තුල ජනිත කරමින් නවකථාව සමාප්තියට පත්වේ.

අමරසේකරගේ "ගමනක මුල" නවකථාවෙන් ආරම්භ වන නවකථා පෙල """''ගමනක අග" කෘතියෙන් අවසන් වන්නේය.මෙම පෙල අර්ධ වශයෙන් ස්වයංචරිතාපනාදනමය ස්වභාවයක් දරයි.එහි ප්‍රධාන චරිතය වන පියදාස තුලින් අමරසේකර නිරූපනය වන බවට පොදු පිලිගැනීමක් තිබේ. අමරසේකරගේ දේශපාලන අදහස් දැක්වීම්වල  එන ප්‍රධාන ප්‍රස්තූතයන් දෙකක් හදුනාගත හැක.

අ) ධනවාදී සමාජයට විකල්පයක් ලෙස සමාජවාදය නිර්මානය කිරීමට මාක්ස්වාදය අසමත්ය.ලංකාව අවශ්‍ය සමාජවාදය බුදුදහම හා සිංහල ජාතික චින්තනය තුල ඇත.

ආ) එකී අරමුන ( සිංහල ජාතික චින්තනය මත පදනම් වූ සමාජවාදය නිර්මාණය කිරීම) සාක්ෂාත් කරනු ඇත්තේ සිංහල උගත් ගැමි තරුන පරපුර විසිනි.

මාක්සියානු සමාජවාදයට විකල්පයක් ලෙස මේ අනුව අමරසේකර යෝජනා කරන ලද්දේ බෞද්ධ සමාජවාදයකි. හෙතෙම එහිදී තම ව්‍යාපෘතිය ස්ථානගත කලේ සිංහල බෞද්ධත්වය ( ජාතිය ) මතය. එල්.ටී.ටී.ඊ සංවිධානය අධිරාජ්‍යවාදීන් විසින් සිංහල බෞද්ධත්වය සුන් කිරීමට යොදාගන්නා බලල් අන්ඩක් ලෙස දුටු හෙතෙම සිවිල් යුද්ධයේ උද්‍යෝගිමත් ආධාරකරුවෙක් වූයේය. අවසානයේ ජාතිය පිලිබද ඔහුගේ සිහිනය ජයගත්තේය. දැන් සිංහල බෞද්ධත්වය ලංකාව තුල පරමත්වයට පත්ව තිබේ.

සිංහල බෞද්ධත්වයේ මෙම ජයග්‍රහනයට සමගාමීව ලංකාව ධනවාදී සමාජයක් සිය ස්වභාවය වඩ වඩා තහවුරු කරගනිමින් සිටී. මෙහිදී ධනවාදී නර රකුස් සමාජයට එරෙහිව අමරසේකර ගෙන ආ විවේචචනය අර්බුදයට යයි. සිංහල බෞද්ධත්වය ජයගත්තද ජාතික චින්තනය තුල තිබෙනවා යැයි අමරසේකර පැවසූ බෞද්ධ සමාජවාදය වෙත සමාජය ගමන් කරන සේයාවකුදු නොමැත.ඒ වෙනුවට ලංකාව ගිලී යමින් තිබෙන්නේ අමරසේකර උග්‍ර ලෙස විරුද්ධ වූ ජේආර් ජයවර්ධන සංවර්ධන මොඩලය තුලය.සිංහල බෞද්ධත්වය විසින් ධනවාදය විස්ථාපනය කරනවා වෙනුවට ධනවාදය විසින් සිංහල බෞද්ධත්වය තමා තුලට උරාගනු ලැබ ඇත.  

එනම් සිංහල බෞද්ධ ධජය විජයග්‍රාහීව ලෙලදෙද්දී විනෝද ආර්ථිකයක් සහිත නගරයක් බවට කොලඹ නගරය පරිවර්තනය කෙරෙමින් තිබේ. මෙය වූ කලී අමරසේකර විසින් හෙලා දකින ලද වසල වෙලද කුලය ට රිසි සේ ආයෝජනය කිරීමටත් එතුලින් ආර්ථික දියුනුව උදා කරගැන්මටත් රුකුල් දෙන වර්ගයේ ආර්ථික චින්තනයකි. මෙම ක්‍රියාවලියේ තාර්කික අවසානය වනුයේ අමරසේකර විසින් හෙලාදුටු බඩ පුරවා ගැනීම පමනක් ජීවිතයේ පරමාර්ථය කරගත් නර රකුසාය.පරිභෝජනවාදී සත්වයාය. ජේආර් ජයවර්ධන ආකෘතිය විසින් සමාජයේ ඇති කරන ඇති නැති පරතරයේ ඝෝර යථාර්තය පීඩිත ජනයාගෙන් වසන් කිරීම සදහා පමනක් සිංහල බෞද්ධ ධජය ලෙලවෙමින් තිබේ. ඇත්ත ලෝකයේ සිදුවන්නේ අමරසේකර ලා පරිකල්පනය කල දෙයෙහි සම්පූර්න පරස්පරයයි.

ජාතිය මූලික කරගෙන බෞද්ධ සමාජවාදයක් නිර්මානය කිරීම පිලිබද අමරසේකරගේ උපන්‍යාසය සම්පූර්නයෙන්ම බිදවැටී ඇත. ධනවාදය නමැති භෞතික ක්‍රියාවලියට ජාතිය හෝ ආගම මූලික කරගෙන මුහුන දිය නොහැක. අමරසේකර විසින් විමුක්තිය ගෙන එනු ඇතැයි සිහින දුටු ගැමි උගත් පරම්පරාව එම උගත්කමේ පිහිටෙන් සිය පරිභෝජන ස්ථරය මාරු කරගෙන තිබෙනවා පමනි. එම පරම්පරාව වශී වී තිබෙන්නේ නාමල් මහතාගේ නයිට් රේස් වලට මිස බෞද්ධ සමාජවාදය ගැන අමරසේකරගේ ධාර්මික ප්‍රවාදයන්ට නොවේ.

බැලූ බැල්මට පශ්චාත් යුද මොහොත අමරසේකරලාගේ මොහොත ලෙස පෙනී ගිය ද සැබැවින්ම අමරසේකරලාගේ ප්‍රස්තුතය බිදවැටී තිබේ. සිංහල බෞද්ධත්වය සිය සටන් පාඨය ලෙස ගත් වත්මන් රෙජිමය දිනෙන් දින විශාල වන ඒකාධිපති යක්ෂයෙකි. එම පසුබිම තුල අමරසේකර වැන්නන්ට නියම වී තිබෙන්නේ එම ඒකාධිපති ව්‍යාපෘතිය සදහා ජාතිකවාදී සායම් තවරමින් පොදුජන වසගය පවත්වාගැනීමට උදවුදීමේ භූමිකාවය. දෙමලාට එරෙහිව සිංහලත්වය උඩ දමමින් දිවයිනට ලියුම් ලියන අමරසේකර ( දැනුවත්ව හෝ නොදැනුවත්ව ) පන පොවමින් සිටින්නේද එකී භූමිකාවට මිස අනෙකකට නොවේ.

Friday, January 18, 2013

දූෂිත රාජ්‍යයක දූෂිත අත්තිවාරම්


නීතිය අවි ආයුද සහ මුදල් 
ව අගවිනිසුරු ලෙස තමාගේ දේශපාලන සුරතලෙක් පත්කිරීමට ජනාධිපති රාජපක්ෂ තීන්දු කොට තිබේ. මොහාන් පීරිස් වූ කලී 2011 දී ජිනීවා නුවර පැවති එක්සත් ජාතීන්ගේ සම්මේලනයක දී ප්‍රගීත් එක්නැලිගොඩ අතුරුදහන් වී නැති බවත් ඔහු විදේශගතව ජීවත්වන බවත් පැවැසූ රජයේ නීති උපදේශකවරයෙකි.දැන් ඔහු අගවිනිසුරුධූරය දරයි.ශ්‍රේෂ්ඨාධිකරන නීතිඥවරු My Lord යැයි කියමින් ඉදිරියේ දී හිස නමනු ඇත්තේ මෙම දේශපාලන සුරතලා ඉදිරියේය.

එක් අතෙකින් එහි ඇති වෙනස්කම කුමක්ද? අගවිනිසුරුධූරයට පත්කරන අවස්ථාවේ සරත් එන් සිල්වා චන්ද්‍රිකා කුමාරතුංගගේ දේශපාලන සුරතලෙක්ව නොසිටියේද? ශිරානි බන්ඩාරනායක මහින්ද රාජපක්ෂගේ හිතෛශියෙක්ව නොසිටියේද? ජනාධිපතිගේ දේශපාලන සුරතලෙක් නොවී අගවිනිසුරු තනතුර ලබාගත හැකිද?

මොහාන් පීරිස් නීතිපති ලෙස කටයුතු කල අවධියේ සිදුකරන ලදැයි කියන වෘත්තීමය විෂමාචාරයක් සම්බන්ධ සාක්ෂි පසුගිය දිනෙක Colombo Telegraph වෙබ්අඩවිය විසින් ප්‍රකාශයට පත්කරන ලදී.එම වෙබ් අඩවියට අනුව නීතිපති වීමට පෙර ඔහු පෙනී සිටි එක්තරා සමාගමකට අදාල නඩුවක් සම්බන්ධව එකගතාවයකට පැමිනෙන ලෙස නීතිපති වූවාට පසු හෙතෙම එම නඩුවේ අනෙත් පාර්ශවය වූ රේගු අධිකාරියට උපදෙස් දී ඇත. අල්ලස් හෝ දූෂන විමර්ශන කොමිසම ඉදිරියේ ඔහුට එරෙහිව පසුගියදා පෙත්සමක් ද ගොනු කෙරුනි.

අධිකරනයේ ස්වාධීනතාවය පිලිබද සියලු චාටු කථා දැන් රජය විසින්ම තූ තූ කොට ඉරා දමා තිබේ. විෂමාචාර චෝදනා සහිත අයවලුන් මෙබදු තනතුරු වලට පත් කෙරෙන්නේම දැනුවත්වය. යම් හෙයකින් ( පසුකාලීනව ශිරානි බන්ඩාරනායක සිදුකලා සේ ) පුද්ගලික ප්‍රතිවිරෝධයක් මත අදාල තනතුරුධාරියා රජය හා වෙනස් මතයක් දරන තැනකට ගියහොත් අතීත විෂමාචාරය කරලියට ගෙන ඔහුට එරෙහිව පියවර ගත හැක.

මෙම අලකලංචිය හමුවේ නීතිඥ ප්‍රජාවේ හැසිරීම මෙහිලා පවතින සිත්ගන්නා සුලු අනෙත් කරුනයි. දෝෂාභියෝගය විභාග වූ සමයේ රැස් වූ නීතිඥ සංගමය දෝෂාභියෝගයට "එරෙහිව" දියාරු යෝජනා කිහිපයක් සම්මත කලේය.දෝෂාභියෝගය ගැන සලකා බලන්නැයි රජයෙන් ඉල්ලා සිටීම, පත්කරන නව අගවිනිසුරු පිලිගැනීම සදහා සාම්ප්‍රදායිකව පවත්වන උත්සවයට සහභාගී නොවී සිටීම එකී යෝජනා ගොන්නට අයත්ය.නව අගවිනිසුරුව පත්කල පසු නිවේදනයක් නිකුත් කල නීතිඥ සංගමය ප්‍රකාශ කොට සිටියේ ඔහු යට‍තේ සාමාන්‍ය ලෙස රාජකාරි කිරීමට තමුන් සූදානම් බවයි.මෙම නිවේදනය නිකුත් කරන ලද්දේ නීතිඥ සංගමයේ සභාපති ඇතුලු කන්ඩායමක් අරලිය ගහ මන්දිරයේදී ජනාධිපති සමග පැවැත්වූ සාකච්ඡාවකින් ඉක්බිතිය.

ඉතින් දැන් කිසිදු අමුත්තක් සිදු නොවූවා සේ යලිත් පෙර පරිදි කටයුතු ආරම්භ වනු ඇත. රාජපක්ෂ හුරතලා නඩු විචාරීමෙහි යෙදෙනු ඇත. දින කිහිපයකට පෙර නීතියේ ආධිපත්‍යය හා අධිකරනයේ ස්වාධීනතාවය වෙනුවෙන් මරාගෙන මැරෙන්නෙමැයි ගර්ජනා කල නීතිඥවරු ඔහු ඉදිරියේ My Lord යැයි පවසමින් දෙකට නැමෙනු ඇත. අධිකරනය යනු ස්වාධීන ආයතනයකැයි දේශපාලන විද්‍යාව ඉගෙන ගන්නා සිසුන්ට පෙර පරිදිම ඉගැන්වෙනු ඇත. ඔවුහු ද එම මුසාව කටපාඩම් කොට විභාග වලට ලියා ඉන් ලැබෙන ප්‍රතිඵල ගැන උදම් වනු ඇත.

යම් හෙයකින් ඉදිරි අනාගතයේ යම් ‍හේතුවක් මත මොහාන් පීරිස් හා ජනාධිපති අතර පුද්ගලික ආරවුලක් ඇතිවුව‍හොත් පීරිස් රජයේ නිල මතයට වඩා වෙනස් තීන්දුවක් දීමට පෙලඹෙනු ඇත.එවිට ඔහුගේ අතීත විෂමාචාර පදනම් කරගෙන රජය පරීක්ෂනයක් අරඹනු ඇත.එවිට නැවතත් ප්‍රජාතන්ත්‍රවාදය වෙනුවෙන් සටන් කරන්නන්ට "සීසන්" එක එලැඹෙනු ඇත. ස්වාධීන අධිකරනයට ඇගිලි ගහන දේශපාලකයන්ට එරෙහිව පෙලපාලියක් දෙකක් යාමට,වොයිස් කට් එකක් දීමට / දේවාලයක පොල් ගෙඩියක් ගැසීමට නීතිඥයින් ඇතුලු පිරිසට අවස්ථාව හිමිවනු ඇත.

මෙම විගඩම නැවත සිදුවීම වැලැක්විය හැකි එකම මාර්ගය විධායකය මෙන්ම අධිකරනය ද කුනු වූ දූෂිත ආයතනයක් බව නොවලහා සමාජය ඉදිරියේ ප්‍රකාශ කිරීමයි.එයම පමනි. මෙම ඒකාධිපති සමාජයේ ගරු අගවිනිසුරුවරු නැත. ඉන්නේ ලෝගුධාරී දේශපාලන හෙංචයියන්ය. ස්වාධීන අධිකරන නැත. තිබෙන්නේ ආන්ඩුවේ රූකඩයකි. නීතියේ මහිමය වෙනුවෙන් පෙනී සිටින විද්වත් නීතිඥවරු නැත. සිටින්නේ මුදල් ඉපයීම සිය ජීවිතයේ පරම නිෂ්ඨාව කරගත් පරමාදර්ශයන් වෙනුවෙන් සිය ජීවිතවල සැප අහිමි කරගැනීමේ සුලු හෝ අවදානමක් ගැනීමට සූදානම් නැති කබා හැදගත් තක්කඩීන් පිරිසකි.මේ ඇත්ත සමාජය ඉදිරියේ කිව යුතුය.මේ ඇත්ත නැවත නැවතත් සමාජය ඉදිරියේ කිව යුතුය.

Friday, January 11, 2013

දුම් පානය හොදයි : පිලිකාව නරකයි

පොලිස් පහර දීමෙන් තුවාල ලත් නේචර් සීක්‍රට්ස් ආයතනයේ කම්කරුවෝ

වසානයේ යාපනය සරසවිය නැවත විවෘත කර තිබේ.ඒ මාසයකට අධික කාලයක් සිසුන් විසින් පවත්වා ගෙන ගිය අඛන්ඩ පංති වර්ජනයකින් පසුය.පසුගිය නොවැම්බර් 27 දින එම සරසවියේ පැවැති උද්ඝෝෂනයකට හමුදාව කඩා වැදී මිලේච්ඡ ලෙස පහර දුන් අතර සරසවි සිසු නායකයින් සිවු දෙනෙක් අත්අඩංගුවට ගැනුනි.එම නායකයින් "ත්‍රස්ත විරෝධී" නීති යටතේ රදවා ගනු ලැබ සිටී.ආරක්ෂක ලේකම් විසින් ඔවුන් "පුනරුත්ථාපනය" සදහා යොමු ‍කොට ඇත.

ත්‍රස්ත විමර්ශන නීති යටතේ පසුගිය මාසය තුල අලුතින් දෙමල තරුනයින් 48 ක් අත්අඩංගුවට ගන්නා ලදී.තවත් තරුනයින් 1000 ක් අත්අඩංගුවට ගැනීම කෙරෙහි අවධානය යොමුව ඇති බව උතුර භාර හමුදා ආඥාපති මහින්ද හතුරුසිංහ මාධ්‍ය වෙත පවසා තිබුනි.

යම් ජාතියක් තවත් ජාතියක් පෙලන්නේද එම පීඩක ජාතිය කවදාවත් නිදහස් නොවනු ඇති බව එංගල්ස් A Polish Problamation හි දී ලීවේ 1874 දීය.ලංකාවේ සිංහල ධනපති ආන්ඩුව පැහැදිලිවම දෙමල උතුර මත පවත්වාගෙන යන්නේ පීඩක තන්ත්‍රයකි.උතුරේ ඇතැම් පාසල්වල දරුවන්ට සිංහල ඉගැන්වීම සදහා ගුරුවරුන් ලෙස හමුදා භටයින් පත්කොට එවා ඇති බවට තොරතුරු පසුගිය දිනවල වාර්තා වූයේය. මේවා වනාහි ජාතික පීඩනයේත්,ජාතික වහල්භාවයේත් පැහැදිලි ප්‍රකාශනයෝ වෙති.

උතුරට එරෙහි මෙම ජාතික පීඩනය සම්බන්ධව සිංහල පොදු සමාජය තුල සමස්තයක් ලෙස ඇත්තේ විරෝධයක් නොව අනුමත කිරීමකි. අධිපති ජනමාධ්‍ය විසින් මෙම පීඩනය "ප්‍රශ්නයක්" ලෙස නොව "ජයග්‍රහනයක්" ලෙස දැකීමට සිංහල පොදු සමාජය පුරුදු කොට තිබේ.වවුනියාව බන්ධනාගාරය වටලා නිරායුද දෙමල සිරකරුවන් මිලිටරිය විසින් කුදලාගෙන ගොස් පහර දී මරා දමන කල්හි එය වීරෝදාර මෙහෙයුමක් ලෙස සලකා දකුනේ පොදු සමාජය අත්පොලසන් දෙන්නේ මේ නිසාය.

හමුදා පහර දීමෙන් තුවාල ලත් යාපන සරසවි ශිෂ්‍යයෙක්
මෙලෙස උතුරේ සමාජයට ප්‍රජාතන්ත්‍රවාදී නිදහස අහිමි කිරීම‍ පෙරලා දකුනේ සමාජයට බලපාන්නේ කෙසේද? යාපන විශ්ව විද්‍යාල සිදුවීම හටගෙන සති කිහිපයක් යාමට පෙර කැලනි සරසවියේ හිටපු මහා ශිෂ්‍ය සංගම් සභාපතිවරයා පහර දීමකට ලක්විය.පහර දුන් මැරයින් ආරක්ෂක අංශවලට සම්බන්ධ බවට සැක කෙරේ.පහර දුන් පිරිස ඔහුට තර්ජනය කොට තිබුනේ "අපි අමාරුවෙන් දිනාගත්ත රට විනාශ කරන්න එපා" යනුවෙනි.මෙරට ශිෂ්‍ය ව්‍යාපාරය මූලික වශයෙන් ගොඩනැගී තිබෙනුයේ අධ්‍යාපන අයිතිය නමැති අක්ෂය වටාය.මෙම අක්ෂය වටා සිසුන් හා සමාජය සංවිධානය කිරීම සිංහල ‍දේශප්‍රේමී කතිකාවත තුල අර්ථනිරූපනය කෙරෙන්නේ "අමාරුවෙන් දිනාගත් රට විනාශ කිරීමක්" වශයෙනි.

මේ අතර නේචර් සීක්‍රට්ස් සමාගමේ කම්කරුවන් හා එහි පරිපාලනය අතර  ගැටුමක් පසුගිය සතියක උද්ගත විය.එහිදී පොලිස් විශේෂ කාර්ය බලකායේ පහර කෑමට ලක්ව එහි සේවිකාවන් ගනනාවක් තුවාල ලැබූහ.2011 දී කටුනායක දීත් හලාවත දීත් හටගත් කම්කරු හා ධීවර සටන්වලදී වෙඩි තබා පුද්ගලයන් මරා දමන ලද්දේ මෙම විශේෂ කාර්ය බලකාය විසින්මය.වැලිකඩ බන්ධනාගාරය වටලා සමූහ වශයෙන් එහි විරෝධතා දැක්වූ සිරකරුවන් ඝාතනය කිරීමෙන් නොනැවතී තෝරාගත් සිරකරුවන් වෙන වෙනම මරා දැමීමක් ද පසුගිය මාසයේ අපි අත් දුටිමු.

මෙම සිදුවීම් විසින් පෙන්නුම් කරනුයේ කුමක්ද? ඒ මර්දනයේ සාහසිකත්වයට උතුරු - දකුනු භේදයක් නොමැති බවයි.වැදගත්ම ප්‍රශ්නය වූ කලී - ඉහත සිදුවීම් වලදී ප්‍රජාතන්ත්‍රවාදී/මානවවාදී සම්මතයන් නොතකා සාහසික ලෙස හැසිරීමට රාජ්‍යයට අවසර ලැබී තිබෙන්නේ කෙසේද යන්නයි.

දමිල උතුරට එරෙහිව සිංහල පොලිසිය 
මෙහිදී සිදුව තිබෙන්නේ ප්‍රජාතන්ත්‍ර විරෝධී මර්ධනකාරීත්වය ආයතනගත වී තිබීමයි.මිලිටරිය පාලකයින්ගේ ආරක්ෂාව සදහා ඇති මර්ධක තන්ත්‍රයක් ලෙස නොව ජාතික ආරක්ෂාව සදහා පවත්වාගෙන යන වීරෝදාර ආයතනයක් ලෙස අභිෂේක කොට තිබෙන්නේ සිංහල දේශප්‍රේමී කතිකාවත විසිනි.තම බංකොලොත්භාවයට එරෙහිව විරෝධය දක්වන කම්කරු,ශිෂ්‍ය,ධීවර වැනි පීඩිත බලවේග කුඩුපට්ටම් කිරීම සදහා පාලකයින් පෙරලා යොදාගන්නේ සිංහලවාදී කතිකාවත විසින් රාජ්‍යයේ මර්ධන උපකරන වෙත සපයා දී ඇති සුජාතභාවයයි.සිංහල ධනපති ආන්ඩු විසින් උතුර මත පවත්වාගෙන යන ජාතික පීඩනය/මිලිටරි මර්දනය මේ අනුව සිංහල පොදු සමාජයට "ආස්වාදයක්" වූව ද සිංහල පොදු සමාජය සිය සැබෑ අයිතීන් වෙනුවෙන් පෙනී සිටින පලමු මොහොතේදීම එලෙස අයිතීන් ඉල්ලන ප්‍රජාවන් චප්ප කරදැමීම සදහා භාවිත කරනු ලබන්නේ ද උතුරට එරෙහිව යොදවන මිලිටරිවාදයම මිස අනෙකක් නොවේ.

උතුරට එරෙහි මර්දනය සදහා අත්පොලසන් දෙන දකුනේ පොදු සමාජය ඒ අත්පොලසන් දීමත්  සමග තමාගේම ප්‍රජාතාන්ත්‍රික හා සමාජ නිදහස අහිමි කරගැනීම සදහා වරෙන්තුව ලියාගන්නේ ඒ ආකාරයෙනි.උතුර මර්දනය කිරීම සදහා රාජ්‍යය විසින් මර්ධක උල් දත් වවාගනිද්දී ,එම උල්දත් වැවීම අනුමත කරමින් , ඒ උල්දත් වලින් උතුර හපාකෑම සාදරයෙන් පිලිගන්නා දකුනට පෙරලා එකී උල්දත් තමා වෙත යොමුවූ කල්හි ඊට පමනක් විරුද්ධ වීමට හැකියාවක් නැත. උතුරේ ජනයා පෙලීමට මර්ධනය පාවිච්චි කිරීම අනුමත කිරීම තුලින් මර්ධනය ආයතනගත කිරීමට අනුමැතිය හිමි වේ.දකුනට එරෙහිවත් මර්ධනය යොදාගැනීමට පාලකයින්ට ඉඩ ලැබෙනුයේ එලෙස මර්දනය ප්‍රජාතන්ත්‍ර විරෝධී ලෙස ආයතනගත වී තිබෙන බැවිනි.ප්‍රජාතන්ත්‍ර විරෝධය ආයතනගත වී තිබෙන විට එය උතුරට එරෙහිව පමනක් ක්‍රියා කොට නතර වනු ඇතැයි සිතීම මන්ද බුද්ධික කල්පනාවකි.

ඔබට සිගරට් බීමට ඇවැසි නම් , සිගරට් ධූමයේ ආස්වාදය විදීමට අවැසි නම් ,ඒ සමග එන රෝගාබාධ භාර ගැනීමටද ඔබ සූදානම්ව සිටිය යුතුය.රෝගාබාධ අත්හැර සිගරට් පමනක් මිලට ගත නොහැක.ඔබ සිගරට්ටුවට අනුමැතිය පල කරන පලමු මොහොතේ දීම ඔබ රෝගාබාධ සදහා ද අනුමැතිය පල කරනු ලබන්නේය.